Nenne’

versi: M. di Francia - F. Berlincioni
musica: M. di Francia - F. Guetta

Nenne’ nun t’arricuorde ‘e ‘stì parole?
‘E quanno ‘e suspirave appriess’a mme?
Parevano ‘e prumesse ‘e ‘na canzone:
busciarde, amare, doce comm’a cchè.

Facevemo l’ammore ‘mmiez ‘a via,
stipannece ‘e carezze pe’ sunna’!...
E mo’ ca s’è cagnata ‘a fantasia
chesti carezze nun t’e ssaccio fa’.

Si me facisse di’: “Te voglio bbene…”,
si po’ sapisse chiagnere pe’ mme,
ma tu t’asciutte ‘e llacrime pe’ nun m’e ffa’ vede’,
me faje dispietto e manco ‘o ssaje pecché!...

L’ammore ‘overo va cercanno ammore…
Nenne’, nun l’he capito ch’è accussì?
Tu pare ca cu’ mme te vuo’ fa’ male:
me dice ‘e no quanno vuo’ di’ che sì!...

Mo’ t’annascunne dint’ a ‘nu penziero,
mo’ avot’ a faccia pe‘ te fa’ vasa’:
si’ comme a ‘nu peccato ca nun voglio cunfessa’,
ma tu pecché m’he fatto ‘nnammura’?...

Nenne’, ma t’arricuorde ‘e ‘stì pparole?

…………………………………………....................

Parevano ‘e prumesse ‘e ‘na canzone:
busciarde… amare… doce…: comm’a tte…!